КОНКУРС ПРАЕКТНЫХ ПРАПАНОВАЎ АД ЭЎРАЗЬВЯЗУ

КОНКУРС ПРАЕКТНЫХ ПРАПАНОВАЎ АД ЭЎРАЗЬВЯЗУ

Эўразьвяз абвясьціў конкурс праектных прапановаў для разьвіцьця патэнцыялу і падтрымкі арганізацыяў грамадзянскай супольнасьці і ўмацаваньня іх супрацоўніцтва зь мясцовымі ўладамі. Сярод прыярытэтаў Эўрапейскай камісіі сёлета:

— Актывізацыя дзеяньняў па стварэньні спрыяльных умоваў для функцыянаваньня НДА;

— Прасоўваньне паўнавартаснага і структураванага ўдзелу НДА ў фармаваньні ўнутранай палітыкі, праграмаваньні Эўразьвязу ды іншых міжнародных працэсах;

— Разьвіцьцё патэнцыялу НДА і павышэньне іх ролі як незалежных актараў разьвіцьця.

Галоўная мэта конкурсу: узмацненьне ролі грамадзянскай супольнасьці і мяcцовых уладаў у Беларусі ў прасоўваньні празрыстага кіраваньня, дэмакратычных рэформаў і правоў чалавека і забесьпячэньне інклюзіўнага сацыяльна-эканамічнага разьвіцьця.

1 лот конкурсу: падтрымка грамадзянскай супольнасьці (НДА), якая будзе весьці да працэсу эфэктыўнага кіраваньня і сацыяльна-эканамічнага разьвіцьця.

Спэцыяльная мэта Лота: павелічэньне ролі грамадзянскай супольнасьці ў забесьпячэньні вяршэнства закону, дэмакратычных рэформаў, павелічэньні публічнай падсправаздачнасьці, а менавіта:

— Паляпшэньне якасьці аказаньня паслугаў дзяржавай (інавацыйныя рашэньні, лепшыя эўрапейскія і міжнародныя практыкі і г.д.);

— Спрыяньне эфэктыўнасьці, справаздачнасьці, празрыстасьці і інтэграванасьці публічных інстытутаў (праз удзел у іх стварэньні, павышэньні патэнцыялу ці ажыцьцяўленьне рэформаў);

— Павелічэньне ўцягнутасьці прадстаўнікоў грамадзянскай супольнасьці ў дыялёг па фармаваньні палітыкі з уладамі, маніторынгу рэформаў і іх імплемэнтацыі ў сацыяльна-эканамічным сэктары (сацыялка, перапрацоўка сьмецьця, транспарт, энэргетыка, ахова здароўя) уключаючы падтрымку прыярытэтаў, вызначаных Нацыянальнай стратэгіяй устойлівага сацыльна-эканамічнага разьвіцьця да 2030 г.;

— Умацаваньне арганізацыяў грамадзянскай супольнасьці праз разьвіцьцё іх патэнцыялу і мэнтарства, асабліва ва ўнутранай справаздачнасьці, зьнешняй дасяжнасьці і грамадзкім удзеле (для лепшага прадстаўленьня інтарэсаў мэтавых групаў і выкарыстаньня мэханізмаў зваротнай сувязі);

— Сумесныя дзеяньні мясцовых уладаў і арганізацыяў грамадзянскай супольнасьці па падтрымцы культурнага і крэатыўнага сэктараў, забесьпячэньне стабільнага сацыяльна-эканамічнага разьвіцьця.

Фінансавы памер Лота 1 складае 1.850.000 эўра зь мінімальнай сумай гранту 1.500.000 і максымальнай – 1.850.000 эўра. Для заўянікаў зь Беларусі сума падтрымкі можа дасягаць 90%, для заяўнікаў з ЭЗ – 75% ад агульнай сумы праекту.

Падрабязныя ўмовы ўдзелу ў конкурсе, а таксама інфармацыю пра іншыя лоты глядзіце па спасылцы.

КОНКУРС ІНІЦЫЯТЫВАЎ “БУДЗЬ ЗДАРОВЫ” АД ПРААН

КОНКУРС ІНІЦЫЯТЫВАЎ “БУДЗЬ ЗДАРОВЫ” АД ПРААН

У другім этапе Конкурсу ўдзельнічаюць Брэсцкая і Гомельская вобласьці, у наступным этапе да ўдзелу запросяць Гарадзенскую і Менскую вобласьці (за выключэньнем Менску).

Да ўдзелу ў конкурсе запрашаюцца: некамэрцыйныя арганізацыі, органы мясцовага кіраваньня і самакіраваньня, зацікаўленыя ў дзейнасьці па наступных тэматычных кірунках:

— Прафіляктыка НІЗ і прасоўваньне ЗВЖ на мясцовым узроўні сярод усіх групаў насельніцтва: скарачэньне ўплыву асноўных фактараў рызыкі, такіх як шкоднае ўжываньне алькаголю, курэньне, нездаровае харчаваньне, нізкі ўзровень фізычнай актыўнасьці і інш.;

— Разьвіцьцё партнэрства і сумеснай дзейнасьці некамэрцыйных арганізацыяў, мясцовых органаў кіраваньня (самакіраваньня) і мясцовых супольнасьцяў, а таксама дзяржаўных і камэрцыйных арганізацыяў, індывідуальных прадпрымальнікаў, накіраваных на прафіляктыку НІЗ і прасоўваньне ЗВЖ на мясцовым узроўні сярод усіх групаў насельніцтва;

— Удасканаленьне прафіляктыкі НІЗ на ўзроўні аказаньня першаснай мэдыцынскай дапамогі;

— Прафіляктыка траўматызму дзяцей і падлеткаў: бясьпечнае асяродзьдзе і жыцьцядзейнасьць.

Сума фінансаваньня на адну ініцыятыву складзе ня больш за 50 тыс. эўра.

Заяўкі можна падаваць у партнэрстве. Дзяржаўныя, камэрцыйныя і іншыя арганізацыі, а таксама індывідуальныя прадпрымальнікі / ніцы могуць выступаць партнэрамі арганізацыяў-заяўнікаў зь ліку некамэрцыйных арганізацыяў або органаў мясцовага кіраваньня і самакіраваньня. Партнэры могуць прымаць удзел у некалькіх мясцовых ініцыятывах, прадстаўленых на Конкурс.

У красавіку 2017 г. Праграма разьвіцьця ААН правядзе інфармацыйныя сустрэчы для патэнцыйных удзельнікаў Конкурсу.

З дадатковымі пытаньнямі зьвяртайцеся праз тэл. +375 33 6829431 і эл. адрас: tatsiana.snitko@undp.org (Тацяна Снітка).

Прыём заявак будзе ажыцьцяўляцца з 1 красавіка па 12 траўня 2017 г.

Палажэньне аб Конкурсе і форма заяўкі знаходзяцца па спасылцы.

ГРАНТЫ АД MAMA CASH

ГРАНТЫ АД MAMA CASH

Mama Cash — першы міжнародны жаночы фонд у сьвеце, які фінансуе і падтрымлівае ініцыятывы па абароне правоў жанчынаў, якія кідаюць выклік глыбінным прычынам прыгнёту на ўсёй плянэце.

Заяўкі на атрыманьне грантаў ад Mama Cash будуць прымацца з 15 сакавіка да 15 траўня 2017 г.

Да ўдзелу ў конкурсе запрашаюцца: амбіцыйныя фэмінісцкія і жаночыя праваабарончыя арганізацыі і ініцыятывы, якімі кіруюць жанчыны, дзяўчаткі і трансгендэрныя людзі.

Перад падачай заяўкі, варта азнаёміцца з крытэрамі і прыярытэтамі фонду. Блянк для падачы заяўкі “Ліст зацікаўленасьці” будзе даступны з 15 сакавіка 2017 г.

Падрабязную інфармацыю пра конкурс глядзіце па спасылцы.

ПРАГРАМА COMMUNITY CONNECTIONS 2017

semya17808

Агенцтва ЗША па міжнародным разьвіцьці (USAID) абвяшчае конкурс на ўдзел у праграме прафэсійна-культурнага абмену Community Connections-2017.

Кандыдаты і кандыдаткі, адабраныя ў выніку конкурсу заявак і гутаркі, атрымаюць магчымасьць прайсьці трохтыднёвую прафэсійную стажыроўку ў ЗША і пазнаёміцца з традыцыямі і культурай гэтай краіны. Удзельнікі і ўдзельніцы будуць пражываць у сем’ях. Веданьне ангельскай мовы для ўдзелу ў праграме не патрабуецца.

Тэмы праграмаў Community Connections у 2017 г.:
— Паслугі па рэабілітацыі дзяцей і маладых людзей з інваліднасьцю;
— Інклюзыўная адукацыя ў школе;
— Разьвіцьцё інфраструктуры падтрымкі інавацыйнага прадпрымальніцтва;
— Роля грамадзкасьці ў разьвіцьці мясцовых супольнасьцяў;
— Навучаньне школьнікаў асновам прадпрымальніцкай дзейнасьці;
— Узмацненьне ролі жанчынаў у вырашэньні сацыяльных праблемаў мясцовых супольнасьцяў.

Графік паездак і ўзоры анкеты-заяўкі глядзіце па спасылцы.

ГРАНТЫ IWMF ДЛЯ ПРАЦЫ СМІ НАД ГІСТОРЫЯМІ, ЯКІЯ ЎПЛЫВАЮЦЬ НА ЖЫЦЬЦЁ ЖАНЧЫНАЎ

Міжнародны фонд жанчынаў, якія працуюць у СМІ, (IWMF) пры падтрымцы некамэрцыйнай арганізацыі The Secular Society (ЗША) ладзіць конкурс на атрыманьне грантаў для працы над журналісцкімі матэрыяламі, якія прысьвечаныя пытаньням і тэмам, што ўплываюць на паўсядзённае жыцьцё жанчынаў і дзяўчатак ва ўсім сьвеце.

Атрымаць грант могуць журналісткі, якія маюць мінімум 3 гады прафэсійнага досьведу. Сярэдні памер гранта складае 5 тыс. даляраў ЗША. Фінансаваньне прызначана для пакрыцьця транспартных выдаткаў (квіткі, авіяквіткі, паслугі кіроўцы і г.д.), кошту візаў, паслуг перакладчыкаў і мясцовых дапаможнікаў падчас працы над журналісцкімі матэрыяламі.

Гранты выдаткоўваюцца ў жніўні, сьнежні і красавіку.

Падрабязную інфармацыю глядзіце па спасылцы.