Вітаем!
Вы на старонцы Асамблеі няўрадавых дэмакратычных арганізацыяў - найбуйнейшага аб'яднаньня незалежных грамадзкіх структураў Беларусі.
Даведацца болей пра Асамблею...
Кампанія "Наша салідарнасьць" Не дамо “недатычную” вас інфармацыю!
Спэцыялісты ўпраўленьня юстыцыі менгарвыканкаму адмовіліся прадастаўляць грамадзянам краіны інфармацыю пра колькасьць НДА Менскага рэгіёну, а таксама пра колькасьць праверак і ліквідацыяў арганізацыяў, зьдзейсьненых у 2003 годзе. На думку чыноўнікаў, гэтая інфармацыя грамадзянаў ня тычыцца.
У лютым бягучага году былі накіраваныя запыты па інфармацыю пра стан НДА ў рэгіёнах краіны. Грамадзяне прасілі прадаставіць інфармацыю аб колькасьці грамадзкіх аб’яднаньняў, зарэгістраваных у абласьцях краіны, колькасьці праверак і ліквідацыяў арганізацыяў. Гэтая дзейнасьць праводзіцца дзеля маніторынгу стану беларускіх НДА.
29 лютага атрыманы адказ з ўпраўленьня юстыцыі Менаблвыканкаму. Чыноўнікі адмовіліся прадаставіць інфармацыю, спасылаючыся на тое, што грамадзяне “ў адпаведнасьці з Канстытуцыяй” маюць права атрымліваць зьвесткі толькі пра тыя арганізацыі, сябрамі якіх яны зьяўляюцца.
Спэцыяліст Упраўленьня юстыцыі Менаблвыканкама спн. Дзьмухайла так патлумачыла сытуацыю: “Такога кшталту інфармацыю мы маем, яна не зьяўляецца сакрэтнай, але паведаміць яе вам ня можам. Вы маеце права знаёміцца толькі з тымі зьвесткамі, якія закранаюць вашыя правы і інтарэсы. Дадзеная інфармацыя вас не датычыцца!”
Даведка:
Маніторынг існага становішча грамадзкіх арганізацыў ажыцьцяўляецца ў межах стратэгіі салідарных дзеяньняў няўрадавых арганізацыяў, якая была распрацаваная ў мінулым годзе. Маніторынг будзе ажыцьцяўляцца рэгулярна. Апрацаваныя вынікі маніторынга будуць скарыстаныя для прававога аналізу дзеючага заканадаўства ў параўнаньні з міжнароднымі стандартамі і заканадаўствамі суседніх краінаў. Гэта, у сваю чаргу, ляжа ў аснову прапановаў па зьменах беларускага заканадаўства з мэтай стварэньня ўмоваў для разьвіцьця НДА.
Алег Патоцкі