Асамблея няўрадавых дэмакратычных арганізацыяў Беларусі
The Assembly Of Pro-Democratic NGOs Of Belarus

Пра Асамблею  |   Старонка ў Facebook

16.10.2009

ЗАЯВА

Рабочай групы Асамблеі няўрадавых дэмакратычных арганізацыяў Беларусі

“Аб грамадзкім абмеркаваньні ацэнкі ўзьдзеяньня на навакольнае асяродзьдзе беларускай АЭС” 

9 кастрычніка  ў горадзе Астравец Гарадзенскай  вобласьці мелі адбыцца грамадзкія слуханьні па ацэнцы ўзьдзеяньня на навакольнае асяродзьдзе беларускай АЭС. Аднак, пры  правядзеньні гэтага мерапрыемтсва арганізатарамі былі зробленыя крокі, якія не дазваляюць лічыць яго паўнавартасным грамадзкім абмеркаваньнем дадзенай праблемы:

- На мерапрыемства не былі дапушчаныя прадстаўнікі шматлікіх няўрадавых арганізацыяў, што не дазволіла правесьці абмеркаваньне з улікам усіх бакоў гледжаньня на праблему пабудовы беларускай АЭС. Тым прадстаўнікам зацікаўленай грамадзкасьці, якія здолелі патрапіць у залю дзе праходзіў сход, ня далі слова. Арганізатары слуханьняў дапусьцілі да абмеркаваньня практычна выключна прыхільнікаў пабудовы беларускай АЭС, адначасова абмежаваўшы магчымасьці данясеньня альтэрнатыўнай кропкі гледжаньня на гэтую праблему.

- Асаблівую занепакоенасьць выклікае тое, што арганізатыры слуханьняў відавочна імкнуліся не дапусьціць на сход прадстаўнікоў няўрадавых арганізацыяў зь Менску і іншых гарадоў краіны. Такім чынам, праблема пабудовы АЭС штучна была зьведзеная да лякальнага ўзроўню, у той час як насамрэч яна зьяўляецца агульнанацыянальным пытаньнем, якое непракоіць грамадзкасьць ва ўсёй краіне.

- Зьмест  абмеркаваньня на гэтым мерапрыемстве  не датычыўся дакумэнта “Ацэнка  ўзьдзеяньня на навакольнае асяроддзьзе  беларускай АЭС”. Пераважная колькасьць часу была прысьвечаная папулярызацыі атамнай энэргетыкі і сацыяльна-эканамічных выгодаў адкрыцьця ў астравецкім рэгіёне буйнога прадпрыемства. Непасрэдна праблема ацэнкі ўзьдзеяньня на навакольнае асяродзьдзе беларускай АЭС засталася па-за ўвагай пасяджэньня, у тым ліку прысутныя не мелі магчымасьці азнаёміцца з  крытычнымі заўвагамі да гэтай ацэнкі. Расейскі навуковец Андрэй Ажароўскі, які меўся прынесьці на пасяджэньне тэкст брашуры з крытычнымі заўвагамі да ацэнкі ўзьдзеяньня на навакольнае асяродзьдзе беларускай АЭС, быў затрыманы праваахоўнымі органамі ля будынку, дзе ладзілася пасяджэньне (пазьней ён быў несправядліва асуджаны на 7 сутак арышту).

Зыходзячы з вышэйзгаданых абставінаў Рабочая  група Асамблеі НДА прыходзіць да высновы, што абмеркаваньне, зладжанае 9 кастрычніка ў горадзе Астравец Гарадзенскай вобласьці ня можа  быць прызнаным у якасьці грамадзкіх слуханьняў па ацэнцы ўзьдзеяньня на навакольнае асяродзьдзе беларускай АЭС у тым сэнсе, які надаецца гэтаму мерапрыемству Орхускай канвэнцыяй. 

Заявы. Звароты

Аб грамадзкім абмеркаваньні ацэнкі ўзьдзеяньня на навакольнае асяродзьдзе беларускай АЭС